УИХ-ын хаврын ээлжит чуулганы өнөөдрийн хуралдааны эхэнд нийт 40 гаруй хуулийн төслийг эцэслэн баталлаа.
Н.Учралын тэргүүлсэн Засгийн газар байгуулагдсанаас хойш өргөн мэдүүлсэн гурван хуулийн төсөл болон хамт өргөн барьсан 40 гаруй хуулийн төслийг эцэслэн баталсан нь энэ юм. Тухайлбал:
- Засгийн газраас 2025 оны нэгдүгээр сарын 9-ний өдөр өргөн барьсан Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг эцэслэн батлах санал хураалтад 86 гишүүн оролцож, 71 нь дэмжлээ.
- Засгийн газраас 2026 оны тавдугаар сарын 12-ны өдөр өргөн барьсан Уур амьсгалын өөрчлөлтийн тухай хуулийн төсөл болон хамт өргөн мэдүүлсэн хуулийн төслүүдийг эцэслэн батлах санал хураалтад 87 гишүүн оролцож, 73 нь дэмжлээ.
- Засгийн газраас 2026 оны зургаадугаар сарын 12-ны өдөр өргөн барьсан Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг эцэслэн баталлаа.
Уг хуулийг баталснаар тэтгэвэр авч буй 500 мянга гаруй ахмадын тэтгэврийг шимтгэл төлсөн хугацаанаас нь хамааруулан 100-300 мянган төгрөгөөр нэмэгдүүлэхээр тусгажээ. Мөн 2013 оноос өмнө 1.4 сая төгрөгийн цалингаасаа тэтгэвэр тогтоолгосон 140 мянган иргэнийг хамруулж, асуудлыг итгэлцүүрээр шийдвэрлэх зорилгоор 2.4 сая төгрөгийн цалингаас тэтгэврийг тооцох замаар зөрүүг арилгах бодлогын шинэчлэл хийхээр байна.
Түүнчлэн Засгийн газраас 2026 оны зургаадугаар сарын 18-ны өдөр өргөн барьсан Онцгой албан татварын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн тогтоолын төслийг эцэслэн батлах санал хураалтад 89 гишүүн оролцож, 77 нь дэмжлээ.
Уг хууль батлагдсанаар янжуур тамхи, дүнсэн болон түүнтэй адилтгах задгай тамхины онцгой албан татварыг 30 хувь болгох бөгөөд хамрын тамхинаас авдаг байсан 20 хувийн гаалийн татварыг онцгой албан татвараар тооцохоор болж байна.
